Երբ պատահի որ բողոքենք թէ շատ զբաղած ենք եւ օրուան քսանչորս ժամերը այլեւս բաւարար չեն որպէսզի մեր գործերը լրացնենք,յիշենք այս "ապակեայ անօթը եւ երկու բաժակ գինի"ի պատմութիոնը:
* * *
Դպրոցի մը մէջ փիլիսոփայութեան դասի ուսուցիչը աշակերտներուն զարմացած ակնարկներուն տակ իր հետ բերած զանազան առարկաներով դասարան կը մտնէ:Առարկաները կը տեղաւորէ իր սեղանին տակի մասը գտնուող պահարանին մէջ ու պահ մը կը սպասէ ,որպէսզի աշակերտները հանդարտին ու լռեն եւ իսկույն կը սկսի իր դասին: Ձեռքը ապակեայ անօթ մը կ 'առնէ եւ զայն կոլֆի գնդակներով կը լեցնէ ու բարձրացնեկով աշակերտներուն կը հարցնէ թէ արդէօք անօթը լեցա՞ծ էր թէ ոչ:Աշակերտները բոլորն ալ միաբերան կը պատասխանեն թէ անօթը բոլորովին լեցած է:Ուսուցիչը սեղանին տակէն մէջը փոքր քարեր պարունակող պարկ մը կը հանէ եւ զայն կը պարպէ կոլֆի գնդակներուն վրայ:Երբեմն անօթը կը շարժէ որպէսզի փոքր քարերը լաւ մը տեղաւորուին կոլֆի գնդակներուն միջեւ գտնուող պարապութիւններուն մէջ:Ուստի դարձեալ կը բարձրացնէ ապակեայ անօթը եւ կը հարցնէ աշակերտներուն թէ արդէօք անօթը լեցա՞ծ է թէ ոչ:Աշակերտները դարձեալ կը պատասխանեն ըսելով թէ անօթը լեցած է: Ուսուցիչը այս անգամ սեղանին տակէն կը հանէ մէջը բարակ աւազ պարունակող փոքր տոպրակ մը ու զայն կը պաարպէ ապակեայ անօթին մէջ:Աւազին հատիկները սողոսկելով կոլֆի գնդակներուն եւ փոքր քարերուն մէջ բոլոր պարապութիւնները կը լեցնեն :Ուսուցիչը դարձեալ կը բարձրացնէ ապակեայ անօթը ու կը հարցնէ իր աշակերտներուն թէ արդէօք անիկա լեցա՞ծ էր թէ ոչ:Աշակերտները այս անգամ աւելի համոզուած կերպով կը պանասխանեն ըսելով թէ ապակեայ անօթը այլեւս բոլորովին լեցած էր:Ուսուցիչը սեղանին տակէն երկու բաժակ գինի կը հանէ եւ զանոնք կը լեցնէ ապակեայ անօթին մէջ գտնուող կոլֆի գնդակներուն ,փոքր քարերուն եւ աւազի հատիկներուն վրայ ու անօթին կափարիչը կը գոցէ:Պահ մը կը սպասէ ,որպէսզի աշակերտները հանդարտին ու յետոյ կը շարունակէ իր դասը :
-Հիմա ենթադրեցէք որ այս ապակեայ անօթը ձեր կեանքն է,իսկ մէջը դրուած կոլֆի գնդակները ձեր կեանքին ամենակարեւոր տարրերը կը ներկայացնեն.ձեր ընտանիքը ,ձեր զաւակները ,ձեր գործը,ձեր ընկերները:Այսինքն այդպիսի բաներ,որոնցմով դուք առանց ուրիշ բանի մը կարիքը զգալու կրնաք ձեր կեանքը շարունակել:Փոքր քարերը երկրորդական կարեւորութիւն ունեցող տարրերն են,ձեր տունը,ձեր ինքնաշարժը եւլն:Իսկ ի վերջոյ աւազն ալ բոլոր միւս սնացածները կը ներկայացնէ:Եթէ ապակեայ անօթը նախ աւազի հատիկներով լեցնենք,կոլֆի գնդակներուն տեղ չի մնար:Նոյն բանը ձեր կեանքին համար ալ կարելի է ըսել,եթէ դուք ձեր ամբողջ ոյժը սպառէք ձեզի համար երկրորդական կարեւորութիւն ներկայացնող բաներուն,անհրաժեշտ եղողներուն համար սպառելիք ոյժը եւ ժամանակը երբեք պիտի չունենաք:Երջանիկ կեանք մը ապրելու համար նախ եւ առաջ ձեզի համար առաջնահերթ կարեւորութիւն ունեցող նախասիրութիւնները կարգի դրէք: Աւելի ժամանակ տրամադրեցէք ձեր ընտանիքին,զբաղեցէք ձեր զաւակներուն հետ:Ընտանիքի մը տէր ըլլալէ հաճոյք զգացէք,ձեր երջանիկ պահերը ապրեցէք ձեր ընտանիքի անդամներուն հետ:Ձեր առողջութեան արժէքը գիտցէք,օր մը պիտի գայ որ զայն պիտի կորսնցնէք:Ձեր ծնողներուն յարգը գիտցէք օր մը պիտի գայ որ անոնք այլեւս պիտի չկարենան ձեր քովը ըլլալ: Ձեր կեանքին ամենակարեւոր տարրերը ապակեայ անօթին մեջ գտնուող կոլֆի գնդակներն են,բոլոր միւս մնացածները միայն աւազի հատիկներ են:Աշակերտներէն մէկը խօսք առնելով ուսուցիչին կը հարցնէ թէ բոլորովին լեցած ապակեայ անօթին մէջ,կափարիչը գոցելէ առաջ լեցուցած երկու բաժակ գինին ինչ կը նշանակէր:Ուսուցիչը գլուխը շարժելով կը պատասխանէ:
-Ձեր կեանքին մէջ որչափ ալ զբաղած ըլլաք,հարազատ ընկերոջ մը հետ երկու բաժակ գինի խմելու համար միշտ ժամանակ տրամադրեցէք:Այդ երկու բաժակ գինին ալ այդ կը նշանակէ:
Օշին Էլակէօզ
4 Յուլիս 2008 Ուրբաթ
Մարմարա Օրաթերթ
4 Յուլիս 2008 Ուրբաթ
Մարմարա Օրաթերթ
No comments:
Post a Comment